Эронга ҳужумдан сўнг Доналд Трампга импичмент эълон қилиниши мумкин
0
Прогрессивлар қанотидан бўлган вакил, Нью-Йорклик конгрессмен Александрия Окасио-Кортес Трампнинг ҳаракатини “Конституциянинг ва Конгресснинг уруш ваколатларининг жиддий бузилиши” деб атади. У ижтимоий тармоқларда шундай ёзди: “Президентнинг Эронни бомбалаш ҳақидаги фожиали қарори импульсив урушни бошлаб юбориш хавфини туғдирди. Бу эса мутлақо ва равшан импичмент учун асосдир.”
Иллинойсдан сайланган яна бир демократ, вакил Шон Кастен ҳам Трампнинг буйруғини кескин танқид қилди: “Ҳеч бир президентда АҚШга яқин хавф солмаётган мамлакатга, Конгресс розилигисиз бомба ташлаш ваколати йўқ. Бу — аниқ импичментга сабаб бўладиган жиноят.” У, шунингдек, импичментга етарли овоз йўқлигини тан олган ҳолда, “Аммо бундай қарорни Конгресссиз қабул қилиб бўлмайди,” дея таъкидлади.
Вакиллар палатасидаги демократлар етакчиси Ҳаким Жеффрис ҳам Трампни кескин танқид остига олди. Унинг айтишича, президент “ҳарбий куч ишлатиш учун Конгресс рухсатини сўрамади ва Американинг Яқин Шарқда ҳалокатли урушга тортилиш хавфини туғдирмоқда.” Жеффрис, шунингдек, баёнотида: “Доналд Трамп ўзининг якка тартибдаги ҳарбий ҳаракати оқибатида юзага келган ҳар қандай салбий натижалар учун тўлиқ ва мутлақ масъулиятни бўйнига олади,” — деб айтди.
Шуни алоҳида таъкидлаш жоизки, тарихда Билл Клинтон, Барак Обама ва Трампнинг биринчи президентлик даврида ҳам Конгресс розилигисиз Ливия, Судан, Афғонистон ва Эрон каби давлатларга қарши ҳарбий амалиётлар бўлиб ўтган. Бу эса, президентларнинг халқаро ҳарбий операциялар юзасидан мустақил ҳаракат қилиши борасидаги доимий ҳуқуқий мунозарани янада чуқурлаштирмоқда.
Президент Трамп тарафдорлари бу ҳаракатни ҳимоя қилмоқда. Вице-президент Ж.Д. Венс НБC Неwsнинг “Meet The Press” дастурида қуйидагича баёнот берди: “Президентда оммавий қирғин қуролларининг тарқалишини олдини олиш бўйича аниқ ваколат бор. Бу президент ваколат доирасидан ташқарида деган фикрга жиддий ёндашган ҳуқуқшунослар рози бўлмайди.”
Шундай бўлсада, Демократлар партиясидаги айрим етакчилар Трампнинг ҳаракати нафақат қонунийлик масаласини кўтараётганини, балки у уруш хавфини орттиргани ва ижро ҳокимияти ваколатларини суиистеъмол қилганини таъкидлашмоқда. Бу эса унга нисбатан импичмент жараёни бошланиши мумкинлигини кўрсатмоқда.
Доналд Трампнинг Эронга қарши якка ҳаракати АҚШ сиёсатида навбатдаги импичмент баҳсини келтириб чиқарди. Демократлар буни конституцион муаммо сифатида кўраётган бўлса, республикачилар эса президент ваколатларининг қонуний доирадаги амалга оширилганини илгари сурмоқда. Жараён қандай якун топишини вақт кўрсатади, аммо сиёсий тортишув аллақачон авж олган.