Ҳиндистонда туғуруқдаги фожиа: чақалоқ қўли узилган ҳолда туғилди
Ҳиндистоннинг Харьяна штатида содир бўлган жуда даҳшатли тиббий фожеа бутун жамоатчилик эътиборини ўзига қаратди. Маълумотларга кўра, 30 июль куни маҳаллий шифохоналарнинг бирида туғуруқ жараёни пайтида шифокорлар эҳтиётсизлиги сабаб янги туғилган чақалоқнинг қўли узилиб кетган. Бу ҳақда ҳодисадан бир неча кун ўтиб, “The Times of India” ва бошқа маҳаллий ОАВлар орқали маълум бўлди.
Гувоҳлар ва чақалоқнинг оила аъзолари айтишича, тиббиёт ходимлари туғуруқ пайтида керакли эҳтиёт чораларига амал қилмаган ва қўпол ҳаракатлар туфайли чақалоқ оғир жароҳат олган. Энг даҳшатлиси, воқеадан кейин оила аъзолари шифокорлардан тушунтириш талаб қилганида, тиббиёт ходимлари уларга ҳақорат қилиб, шифохонадан ҳайдаб чиқарган.
Вазиятнинг кескинлашиши натижасида чақалоқ бошқа шифохонага олиб борилган. Ҳарьяна инсон ҳуқуқлари комиссияси ҳодисага расмий равишда аралашиб, уни Ҳиндистон Конституциясининг 21-моддасида кафолатланган ҳаёт ва соғлиқ ҳуқуқининг қўпол бузилиши сифатида баҳолади. Комиссия шунингдек, БМТнинг Бола ҳуқуқлари тўғрисидаги конвенциясидаги 6- ва 19-моддалар ҳам бузилганини таъкидлади.
Маълумот учун, конвенциянинг 6-моддаси ҳар бир боланинг туғилган ондан бошлаб яшаш ҳуқуқига эгалигини белгилайди. Давлатлар болаларнинг ҳаёти ва соғлиғини ҳимоя қилиш, шунингдек уларнинг жисмоний, руҳий ва ижтимоий ривожланиши учун барча зарур чоралар кўришга мажбур. 19-модда эса болаларни ҳар қандай зўравонлик, эътиборсизлик ва ёмон муомаладан ҳимоя қилиш учун қонунчилик ва ижтимоий тизимлар орқали профилактика чораларини жорий этишни талаб қилади.
Бу фожеа Ҳиндистонда тиббий хизмат сифати ва тиббиёт ходимлари масъулияти бўйича жиддий саволлар туғдирди. Жамоатчилик ва ҳуқуқ ҳимоячилари ҳодисани тўлиқ тергов қилиш, айбдорларни жазолаш ва бундай ҳолатлар такрорланмаслиги учун қонунчиликда ислоҳотлар ўтказишни талаб қилмоқда.