Эрон Кавказда “Трамп йўлаги”га қатъий қарши чиқди
Эрон олий раҳбари маслаҳатчиси Али Акбар Вилоятий Кавказ минтақасида АҚШ ташаббуси билан яратилиши режалаштирилаётган йўлак ҳақида ўз муносабатини билдириб ўтди. Унинг таъкидлашича, Теҳрон бундай лойиҳага ҳеч қачон рози бўлмайди ва бу масалада ўз қатъий позициясини сақлаб қолади. Вилоятий бу ҳақда Tasnim агентлигига берган интервьюсида айтиб ўтди, унинг сўзларидан Interfax иқтибос келтирган.
“Бундай йўлак АҚШ президенти Доналд Трампнинг ёлланма аскарлари учун хизмат қиладиган майдонга айланади, аммо у аслида Америка раҳбарига тегишли бўлмайди”, — деди Вилоятий.
Эронлик сиёсатчи шуни ҳам эслатдики, Теҳрон илгари ҳам Зангезур йўлагини яратиш ғоясига қарши чиққан. Унинг фикрича, бу йўлак минтақа геосиёсий муҳитида янги қарама-қаршиликларни келтириб чиқариши, чегараларни кесиб ўтиш орқали минтақавий барқарорликка путур етказиши ва Арманистоннинг парчаланишига олиб келиши мумкин.
Маълумот учун, 8 август куни АҚШ президенти Доналд Трамп Ереван ва Боку ўртасидаги тинчлик келишувига тўсқинлик қилиб келган асосий масала — ушбу транспорт йўлагидан фойдаланиш бўйича келишувга эришганини эълон қилди. Шунингдек, йўлак расман “Трампнинг халқаро тинчлик ва фаровонлик йўли” деб номланиши маълум қилинди.
“Биз аввалги музокараларни издан чиқарган асосий масалани ҳал этдик. Бу келишув декларацияда ҳам мустаҳкамлаб қўйилди. Йўлакка бундай ном бериш мен учун катта шараф, аммо мен буни сўрамаганман”, — деди Трамп.
Америка етакчисининг сўзларига кўра, “бу махсус транзит ҳудуди” Озарбойжонга Арманистон суверенитетига тўлиқ ҳурмат билдираган ҳолда Нохичеванга ўтиш имконини беради. Шу билан бирга, Арманистон ҳам йўлакни ривожлантириш учун АҚШ билан эксклюзив ҳамкорлик йўлга қўймоқда.
Эндиликда, бу лойиҳа минтақада геосиёсий тортишувларни янада кучайтириши ёки аксинча, тинчлик ва иқтисодий ривожланиш йўлига хизмат қилиши ҳақида жиддий баҳслар авж олмоқда.