Латвияга сафар қиладиган ўзбекистонликлар янги тартибга риоя қилади
Латвияга ташриф буюрадиган Ўзбекистон фуқаролари энди сафар мақсадини олдиндан расмийлаштириши ва хабардор қилиши лозим бўлади. Бу ҳақда “Дунё” ахборот агентлиги маълум қилди.
Маълум қилинишича, Латвия Иммиграция тўғрисидаги қонунига янги ўзгартишлар киритилди. Янги қоидаларга мувофиқ, 2025 йил 1 сентябрдан бошлаб Европа Иттифоқи мамлакатлари томонидан берилган Шенген визаси ёки яшаш гувоҳномасига эга бўлган учинчи давлат фуқаролари, жумладан Ўзбекистон фуқаролари ҳам, Латвияга ташриф буюрганда аввалдан расмий хабардор қилиш тартибини бажариши керак.
Бу тартибга кўра, Латвия расмийлари томонидан берилган виза ёки яшаш гувоҳномасига эга бўлмаган шахслар сафар қилишларидан камида 48 соат олдин eta.gov.lv портали орқали ўзлари ҳақида тегишли маълумотларни тақдим этишлари лозим. Бу мажбурият Латвия орқали транзитда ҳаракатланаётган шахсларга ҳам татбиқ қилинади.
Ташриф буюрувчи шахс шахсан ўзини eta.gov.lv сайти орқали рўйхатга олиб, тақдим этилган маълумотларнинг электрон тасдиғини олиши керак. Бу жараён Латвия томонидан шахснинг сафар мақсади ва маълумотлари расмий равишда қабул қилинганини таъминлайди.
Латвия Ички ишлар вазирлиги маълумотларига кўра, тақдим этилиши зарур бўлган маълумотлар сираси қуйидагилардан иборат:
сафар кириш мақсади ва асосий сабаби;
режалаштирилган туриш вақти ва манзили;
сафар йўналиши ва ҳаракат тартиби;
шахснинг алоқа маълумотлари;
шахс ёки унинг оила аъзоларидан бири сайланадиган лавозимларда фаолият юритганлиги;
сайловларда номзод сифатида қатнашгани;
давлат ёки маҳаллий ҳокимият органларида ҳозирги ёки собиқ лавозими;
Қуролли кучлар, махсус хизматлар, чегара қўшинлари, божхона, ички ишлар, адлия ёки ташқи ишлар вазирлиги шу жумладан дипломатик хизматлардаги фаолият ҳақидаги маълумотлар.
Агар хорижлик шахс ушбу маълумотларни тақдим қилмаса ёки нотўғри ва тўлиқ бўлмаган маълумот берса, у ҳолда маъмурий жавобгарликка тортилади. Янги қоида дипломатик иммунитетга эга шахслар, расмий вазифаларни бажарувчилар ёки қисқа муддатга техник қўллаб-қувватлаш учун Латвияга келаётган шахсларга татбиқ қилинмайди.