Ливерпулдаги жаҳон чемпионатида ўзбек бокси кечаси ёрқин ўтди

Англиянинг Ливерпул шаҳрида бокс бўйича 2025 йилги жаҳон чемпионати қизғин паллага кирди. Шу кунларда дунёга машҳур рингда турли вазн тоифасидаги энг кучли спортчилар юзма-юз келмоқда.

5 сентябр куни кечқурун Ўзбекистон шарафини ҳимоя қилаётган бир қатор боксчилар майдонга чиқди. Аввал аёллар ўртасида -57 кг вазнда беллашган Ҳуморабону Мамажонова Янги Зеландия вакили Лаи-Карлиле Алини мутлақ устунлик билан ортда қолдирди. Учрашув якунида ҳакамлар бир овоздан 5:0 ҳисобида ғалабани ўзбек боксчисига топширди. Мамажонова энди ўзининг навбатдаги жангини 7 сентябр куни ўтказади.

Шундан сўнг эркаклар ўртасидаги -50 кг вазн тоифасида Шодиёржон Мелиқўзиев рингга қадам қўйди. Унинг рақиби Саудия Арабистони вакили Наваф Аважи бўлди. Мелиқўзиев иккинчи раунддаёқ рақибини техник нокаутга учратиб, муҳим ғалабага эришди. Энди у 9 сентябр куни австралиялик Омер Изазга қарши майдонга чиқади.

Кечанинг энг катта қизиқиш уйғотган жанги эса оғир вазн тоифасида ўтди. Ўзбекистонлик Жаҳонгир Зокиров +90 кг вазнда жазоирлик рақиб Моурад Кади билан кураш олиб борди. Шиддатли ва мураккаб кечган тўқнашув якунида Зокиров ҳакамларнинг якдил қарорига кўра 5:0 ҳисобида зафар қучди.

Маълумотларга кўра, World Boxing шафелигида илк бор катталар ўртасида ўтказилаётган ушбу нуфузли мусобақада 68 мамлакатдан 554 нафар спортчи иштирок этмоқда. Улардан 329 нафари эркаклар, қолган 225 нафарини эса аёллар ташкил қилади. Чемпионат 4 сентябрдан бошланиб, 14 сентябр куни ўз якунига етади.

Шу тариқа, ўзбек боксчилари чемпионатнинг дастлабки кунларидаёқ мухлисларга чиройли ва ёрқин ғалабалар тақдим этишди. Олдинда уларни яна кўп синовлар кутади.