Тайсон ва Мейвезер 2026 йилда рингга чиқади

Бокс оламининг икки афсонавий номзоди — Майк Тайсон ва Флойд Мейвезер 2026 йил баҳорида кўргазмали жанг ўтказиши кутилмоқда. Бу ҳақда TMZ нашри хабар берди.

Кўргазмали жангнинг асосий фарқи — унинг натижалари расмий ҳисобга киритилмайди, яъни боксчиларнинг ғалаба ёки мағлубият статистикасига таъсир қилмайди. Ҳозирча жанг санаси ва ўтказиладиган жойи ошкор этилмаган, аммо тарафлар шартнома имзолаган.

Майк Тайсон бу борада қуйидагича фикр билдирди:

«Мен ҳам, дунё ҳам бу жанг ҳақиқатга айланишини тасаввур қилмаган эди. Аммо бокс янги ва кутилмаган даврга кирди. Ростини айтсам, Флойд рози бўлганига ҳали ҳам ишонмайман. Бу унинг соғлиғига салбий таъсир қилиши мумкин».

Флойд Мейвезер эса жавобан шундай деди:

«Мен 30 йилдан буён рингдаман ва меросимни шубҳа остига қўядиган рақиб ҳеч қачон бўлмаган. Агар жанг қилсам, бу эпик ва афсонавий бўлиши шарт. Мен бокс тарихида энг зўрман».

Флойд Мейвезер — бешта вазн тоифасида жаҳон чемпиони ва 1996 йил Олимпиадасида бронза медали соҳиби. У ўзининг бутун фаолияти давомида бирорта ҳам мағлубиятга учрамаган. 2017 йилда у Конор Макгрегорга қарши жангда ғалаба қозонган эди.

Майк Тайсон эса 50 та ғалаба ва 6 та мағлубиятга эга. Унинг сўнгги профессионал жангида 2005 йилда Кевин Макбрайд устун келган. 2024 йилда эса Тайсон 19 йиллик танаффусдан кейин рингга қайтиб, блогер Жейк Полга мағлуб бўлди.