Microsoft: Қизил денгиздаги кабель узилиши Azure хизматларига таъсир кўрсатди

Microsoft ўзининг булут платформаси Azure’да муаммолар пайдо бўлганини маълум қилди. Бу ҳақда Techcrunch.com хабар берди.

Маълум қилинишича, Қизил денгиздан ўтувчи муҳим интернет кабеллари зарарлангач, айрим ҳудудларда интернет ва булут хизматларида узилиш кузатилган.

Компания муҳандислари вазиятни диққат билан кузатмоқда ва барча хизматларни қайта тиклаш учун чора кўрмоқда. Шунга қарамай, фойдаланувчилар айрим кечикиш ва узилишлардан шикоят қилмоқда.

Қизил денгиздаги кабель линиялари глобал интернет тизимининг ажралмас бўлаги ҳисобланади. Шу сабабли бундай носозликлар бутун дунёда сезиларли таъсир кўрсатиши мумкин.

Мутахассислар муаммо тез орада ҳал этилишини билдирди. Сизнингча, интернетнинг бундай заиф жойлари келажакда қандай ҳимоя қилиниши керак?