Ўзбекистон U-17 Марокашга қарши голли баҳсда мағлуб бўлди

Испания шаҳри Херезда ўтказилаётган халқаро ўртоқлик мусобақаси доирасида Ўзбекистон U-17 терма жамоаси Марокаш ёшларига қарши майдонга тушди. Қизғин ва драматик кечган тўқнашувда вакилларимиз 4:3 ҳисобида мағлубиятга учради.

Беллашув давомида юртимиз ёшлари бир неча маротаба ташаббусни қўлга олган бўлса-да, рақиб жамоа ўйин охирига қадар устунликни сақлаб қолишга муваффақ бўлди. Ўзбекистон сафида голларга Сайфиддин Содиқов, Мўминхон Баҳодирхонов ва Германия клуби “Рот Веисс Айнтрахт” таркибида тўп сурадиган Хайрулло Эргашев муаллифлик қилди.

Умуман олганда, ёш футболчиларимиз ўйин давомида кўплаб ҳаракатларни намойиш этиб, рақиб ҳимоясига жиддий босим ўтказишди. Бироқ муваффақиятли зарбаларга қарамай, Марокаш термаси ўз имкониятларидан унумли фойдаланиб, ғалабани қўлга киритди.

Ўзбекистон U-17 таркиби қуйидагича шаклланди: Неъматуллоҳ Рустамжонов, Муҳаммад Ҳакимов, Мўминхон Баҳодирхонов, Миразиз Абдукаримов, Муҳаммад Хабибуллаев, Сайфиддин Содиқов, Муҳаммадали Мусахонов, Абубакр Шукуруллаев, Азизбек Эримбетов, Аслбек Алиев ва Ҳожиакбар Юсуфбоев.

Шу тариқа, ёш терма жамоамиз Испаниядаги йиғин доирасида қимматли тажриба орттиришни давом эттирмоқда. Бундай беллашувлар келгусида жаҳон чемпионати баҳсларида муҳим аҳамият касб этади.