Ўзбекистондаги икки канал халқаро мерос сифатида эътироф этилди
Ўзбекистон сув хўжалиги соҳасида катта ютуққа эришди — мамлакатдаги икки муҳим канал халқаро ирригация мероси деб топилди. Бу ҳақда Сув хўжалиги вазирлиги Ахборот хизмати орқали маълум қилинди.
2025 йил учун «WHIS Award» (Бутунжаҳон ирригация мероси) мукофотига Ўзбекистондаги “Дўстлик” ва “Эски Туятортар” каналлари муносиб кўрилди. Мазкур мукофот 100 йилдан ортиқ вақтдан бери ишлатиб келинаётган, тарихий аҳамият касб этувчи гидротехника иншоотларига берилади. Ушбу қарор Халқаро ирригация ва дренаж комиссияси томонидан қабул қилинган.
“Дўстлик” канали Сирдарё ҳавзасида жойлашган бўлиб, у Ўзбекистон ва Қозоғистон ҳудудларидан ўтадиган трансчегаравий йирик ирригация иншооти ҳисобланади. Бу канал орқали минглаб гектар ерлар сув билан таъминланади ва қишлоқ хўжалиги ривожига катта ҳисса қўшилади.
“Эски Туятортар” канали эса Зарафшон дарёсида жойлашган кўп асрлик тарихий гидротехника обидасидир. У бир неча юз йиллар мобайнида сув тақсимоти ва деҳқончиликнинг асосий манбаи бўлиб келган.