50 ёшдан ошса ҳам ёш кўринадиган юлдузлар: уларнинг гўзаллик қоидалари

Авваллари шоу-бизнес дунёсида ёшликни сақлаб қолиш учун қаттиқ диеталар, оғир ва қиммат муолажалар асосий йўл сифатида кўриларди. Аммо вақт ўтиши билан қарашлар ўзгарди: энди эътибор спортга, соғлом интизомга ва табиийликка қаратилмоқда. Баъзи машҳур аёллар ўз ҳаёти ва турмуш тарзи билан буни намоён этмоқда. Улар ёш кўринишни сақлаб қолишда мураккаб экспериментлардан кўра, оддий, аммо изчил одатларни устун қўйишмоқда.

Ҳолли Берри — фитнес ва минимализм қуввати

Ҳолли Берри 59 ёшда бўлса-да, кўпчилик уни 40 ёшдан катта деб ўйламайди. Унинг сирларидан бири — спорт ҳаётининг ажралмас қисмига айланиб улгургани. Ҳар ҳафта камида беш марта машғулот қилади. Машғулотлари турлича: бокс, куч машқлари ва йога. Ҳар бир машғулот 30–40 дақиқадан кам бўлмайди. Бу унинг тана шаклини, қувватини ва тери жозибасини сақлаб туради.

Парваришда эса у минимализм тарафдори. Тери учун фақат уч қадамга амал қилади: тозалаш, намлантириш ва қуёшдан ҳимоя. Берри СПФ кремни ҳатто уйда бўлганида ҳам ишлатади. У ароматик қўшимчаларсиз маҳсулотларни танлайди ва антиоксидантларга бой сабзавот ва меваларни рациондан асло чиқармайди.

Бу оддий тизим унга тўлиқ ёрдам беряпти: юзидаги ёшлик жилоси йиллар давомида сақланиб қолмоқда.

Женнифер Лопес — интизом ва соғлом тарз

Женнифер Лопес 56 ёшда бўлса-да, унинг ташқи кўриниши кўпчиликни ҳайратга солади. Унинг қоидаси қатъий интизом ва тўғри ҳаёт тарзи. Алкогол ва кофеиндан бутунлай воз кечган, чунки улар терига зарарли таъсир кўрсатиб, қора доғлар келтириши мумкин.

Жей Ло уйқуни алоҳида қадрлайди: кунига 7–8 соат ухламасдан ўтмайди. Жадвали қай даражада тиғиз бўлмасин, соғлом уйқуни устувор қўяди.

Парваришда мураккаблик йўқ. У ҳам тозалаш, намлантириш ва СПФдан иборат оддий қадамларни бажаради. Аммо у барчасини қатъий мунтазамлик билан амалга оширади. Мақсад — ҳеч қачон макияж билан ухламаслик, ҳар куни эрталаб ва кечқурун терига вақт ажратиш.

Мухлислар унинг интизоми ҳар қандай косметик процедурадан самаралироқ дейишади. Шу сабабли Женнифер ёшлик ва энергия рамзи бўлиб қолмоқда.

Шакира — энергия ва табиий кўриниш

Шакира 48 ёшда бўлишига қарамай, саҳнадаги қуввати 20 ёшлик ижрочилар билан тенглашади. Унинг сири спорт ва рақсда. Фитнесдан ташқари, у рақс ҳаракатларини соатлаб такрорлайди. Бу унинг учун ҳам машқ, ҳам ижод.

Шакира косметик жиҳатдан табиийликка интилади. Унинг образи — минимал макияж, кўпроқ энергия ва самимийлик. Бу йўл унинг услубига айланди.

Шакира кўрсатиб берди: табиийлик ва ҳаракат ҳаётда чексиз муолажалардан кўра кўпроқ ёрдам беради.