«Қўқон-1912» узоқ серияни тўхтатди: голларни томоша қилинг

Ўзбекистон чемпионати 21-тур учрашувлари тобора қизғин кечмоқда. Куни кеча Қўқон шаҳридаги стадион мухлисларга қизиқарли ва тўлиқ драматизмга бой тўқнашувни тақдим этди. «Қўқон-1912» жамоаси ўз майдонида «Қизилқум» клубини қабул қилди ва курашли баҳсда 2:1 ҳисобида зафар қозонди.

Учрашувнинг дастлабки дақиқалариданоқ икки жамоа ҳам гол уришга интилди. Ҳисобни қўқонликлар очди – 16-дақиқада Датси Келейди пенальтини аниқ ижро этиб, жамоасини олдинга олиб чиқди. Бироқ «Қизилқум» тез орада жавоб қайтарди: 28-дақиқада Ислом Кенжабоевнинг голи меҳмонларга умид бағишлади.

Биринчи бўлим тенг кучли курашлар ичида ўтди. Аммо иккинчи тайм бошланиши билан майдон эгалари устунликни қўлга киритди. 47-дақиқада Муҳаммаданас Ҳасанов рақиб дарвозасини ишғол қилиб, ҳисобни 2:1 кўринишига олиб келди. Шу гол учрашув тақдирини ҳал этди.

Беллашув охирига қадар ҳар икки жамоа ҳам яна бир марта гол уришга уринди, бироқ ҳимоячилар ва дарвозабонлар хатога йўл қўймади. Шу тариқа, қўқонликлар мухлисларини навбатдаги муҳим ғалаба билан хурсанд қилди.

Бу натижа «Қизилқум»нинг мағлубиятсиз сериясига чек қўйди. Навоий клуби охирги бор 6 июн куни мағлубиятга учраган эди, орадан узоқ вақт ўтиб, уларнинг серияси Қўқонда тўхтатилди.

Суперлига. 21-тур. 13 сентябр
Қўқон-1912 — Қизилқум 2:1
Голлар: Келейди (16, пенальти), Ҳасанов (47) — Кенжабоев (28).