Кореялик эркак икки йилда 60 000 марта полицияга қўнғироқ қилди

Жанубий Кореяда яшовчи 50 ёшли эркак икки йил давомида зерикиб полицияга деярли 60 минг марта телефон қилгани маълум бўлди. Бу ҳақда The Korea Herald хабар берди.

Маълумотларга кўра, у шу вақт ичида жами 58 307 марта қўнғироқ қилган, яъни кунига ўртача 80 марта. Энг юқори фаоллик 2024 йил май ойига тўғри келган — тўрт кун ичида эркак ҳуқуқ-тартибот идораларига қарийб 2000 марта мурожаат қилган.

Маълум қилинишича, у аввалроқ телефон орқали безовта қилгани учун маъмурий жазога тортилган, янги қонун лойиҳаси эса унга жуда ёқмаган. Шунинг учун у полицияга қайта-қайта мурожаат қилишни давом эттирган.

Қўнғироқлар жараёнида эркак турли ёлғон баёнотлар берган: ҳатто укасини ўлдириш билан таҳдид қилган ёки сўнгги 10 йилдан бери асирликда сақланаётганини айтган. Текширув натижасида 50 дан зиёд қўнғироқ оғир жиноятлар қаторига кириши аниқланган.

Айни вақтда у хизмат бурчларига тўсқинлик қилгани учун тергов қилинмоқда. Эркак полиция билан боғланишга бўлган бундай уринишларини ўзининг ёлғизлигини енгиш усули сифатида изоҳлаган. У кўп ҳолларда уйда ёлғиз ичиб олиб, кейин полицияга қўнғироқ қилишни одат қилган.

Маълумотларга кўра, уни беш йилгача қамоқ ёки 10 миллион вон миқдорида жарима кутиши мумкин.