Ўзбекистон ММА жамоаси Тбилисида янги тарих ёзмоқда

Айни кунларда Грузиянинг пойтахти Тбилиси шаҳри ҳаваскор ММА (IMMAF) жаҳон чемпионатига мезбонлик қилмоқда. Унда дунё бўйлаб 63 давлатдан келган спортчилар ғолиблик учун майдонга чиқишмоқда. Бу нуфузли мусобақа нафақат ёшлар, балки бутун дунё ММА жамоатчилигининг эътиборини ўзига қаратди.

Эътиборлиси, Ўзбекистондан борган ёш вакиллар ҳам турнирда муносиб иштирок этишмоқда. Гарчи ММА мамлакатимизда расман тан олинганига ва Ўзбекистон ММА ассоциацияси ташкил этилганига кўп бўлмаган бўлса-да, қисқа вақт ичида катта натижалар қайд этилди.

Эслатиб ўтамиз, ўтган йили Тошкентда ўтган жаҳон чемпионатида ҳам юртимиз спортчилари ажойиб иштирок этиб, умумжамоа ҳисобида биринчи ўринни қўлга киритган эди. У пайтда 72 мамлакатдан 843 спортчи қатнашиб, жами 80 та медал тақдим этилган бўлса, улардан 30 таси Ўзбекистон термаси ҳисобига ёзилган. Бу кўрсаткич Ўзбекистон ММА жамоасини дунёдаги энг кучлилар сафидан жой олишини таъминлади.

ММАдаги беш йиллик қисқа йўлни катта тарихий натижалар билан босиб ўтган юртимиз спортчилари бугун дунё майдонида ўз кучини яна бир бор исботлаяпти. Бу ютуқлар ортида, албатта, спортчиларнинг тинмай меҳнат қилиши, мураббийларнинг самарали тайёргарлиги ва давлатимизнинг спортга қаратаётган жиддий эътибори ётибди.

Шунингдек, ассоциация мутасаддилари ва мураббийлар жамоасининг соғлом муҳит яратишдаги фидойилиги ҳам юқори баҳоланди. Бунга яққол мисол сифатида, яқинда Ўзбекистон ММА ассоциацияси “Йилнинг энг яхши ассоциацияси” номинациясига сазовор бўлди.

Ҳали олдинда катта марралар, кўплаб синoвлар турибди. Бироқ ишонч комилки, ассоциация ва спортчиларнинг уйғун меҳнати, давлат қўллови ва мухлислар ишончи билан ўзбек ММАси яқин йилларда яна кўплаб тарихий ғалабаларга эришади.