Гвардиола: Ҳар сафар Холанднинг рекордини айтасиз

Эрлинг Холанд чоршанба куни 'Боруссия' дарвозасини ишғол қилди. Норвегиялик футболчи уч хил клуб сафида Чемпионлар лигасида кетма-кет бешта ўйинда гол урган биринчи ўйинчи бўлди.

Бундан ташқари, Холанд 'Манчестер Сити'нинг ушбу мусобақадаги гол уриш серияси бўйича клуб рекордини ҳам ўрнатди. 'Шаҳарликлар' бош мураббийи Хосеп Гвардиола 4:1 ҳисобидаги ғалабадан сўнг Холанднинг рекордлари ҳақида фикр билдирди.

'Янги рекордми? Мен буни билмасдим.

Ростини айтсам, билмасдим. Ҳар сафар флэш-интервю ёки матбуот анжуманига келганимда, Холанднинг янги рекорди ҳақида айтасиз.

Мен унинг учун хурсандман. У бунга лойиқ.

Унинг атрофида қанча кўп яхши футболчилар бўлса, шунча осонроқ бўлади. Топ-клубларда ҳамиша шундай.

Яхши ўйинчилар бутун жамоанинг салоҳиятини оширади', – деди Гвардиола TNT Sports'га. 'Манчестер Сити' ўзининг навбатдаги ўйинини 9-ноябрь куни АПЛ доирасида 'Ливерпул'га қарши ўтказади.