Навоийда энергия сақлаш тизими қурилади

Навоий вилоятида қуввати 300 МВт бўлган энергия сақлаш тизими қурилиши режалаштирилмоқда. Бу ҳақда Ўзбекистон Энергетика вазирлиги маълум қилди.

Қурилиш бўйича Masdar компанияси билан келишув Aбу-Дабида ўтказилган ADIPEC 2025 халқаро форумида имзоланди. Лойиҳа энергетика тизимининг барқарорлигини ошириш ва яшил энергияни сақлаш инфратузилмасини ривожлантиришга қаратилган.

Шунингдек, форум давомида AMEA Power компанияси билан қуввати 200 МВт бўлган яна бир энергия объекти қурилиши бўйича шартнома имзоланди. Вазирлик маълумотига кўра, Абу-Дабидаги музокаралар давомида ўзбек делегацияси Бирлашган Араб Aмирликлари, Германия, АҚШ ва Буюк Британия вакиллари билан қайта тикланувчи энергия соҳасидаги жорий лойиҳалар ва ҳамкорликни кенгайтириш режалари юзасидан фикр алмашди.