Ковач: "Манчестер Сити"нинг кучини кўрдик

Дортмунднинг "Боруссия" клуби бош мураббийи Нико Ковач Чемпионлар лигаси доирасида "Манчестер Сити"га қарши кечган ўйиндаги мағлубиятни (1:4) изоҳлади. "Шаҳарликлар" ҳар икки бўлимда ҳам икки тадан гол уришди.

Голларга Фил Фоден (дубль), Эрлинг Холанд ва Райан Шерки муаллифлик қилишди. Меҳмонлар сафидаги ягона гол Валдемар Антон томонидан киритилди.

"Биз "Манчестер Сити"нинг нақадар кучли эканлигини кўрдик. Дастлабки 15 дақиқада яхши ҳаракат қилдик, тўпга эгалик қилдик ва ўйинни назорат қилдик.

Аммо кейин рақиб тезликни ошириб, ўз маҳоратини намойиш этди. Бундай ўйинларда хатоларга йўл қўйиб бўлмайди.

Лекин бу биз учун муҳим тажриба бўлди – кўп нарсани ўргандик. "Манчестер Сити"ни табриклашдан бошқа иложимиз йўқ.

Бу жамоа энг юқори даражага эга. Улар ўз имкониятларини самарали амалга оширди, биз эса йўқ.

Фарқ айнан шунда эди", – деди Ковач УЕФА расмий сайтига берган интервьюсида. "Боруссия" Чемпионлар лигаси умумий турнир жадвалида 7 очко билан 14-ўринни эгаламоқда.