“Барселона” мухлисларини олиб кетаётган автобус ёниб кетди

Европа Чемпионлар лигаси умумий босқичининг 4-тури доирасида “Барселона” Бельгияда “Брюгге” меҳмони бўлди. Қизиқарли ва драматик кечган учрашувда жамоалар 3:3 ҳисобида дуранг қайд этишди. Аммо катта баҳсдан кўра кўпроқ муҳокамага сабаб бўлган воқеа ўйиндан аввал рўй берди.

Маълум бўлишича, Испаниядан келган “Барселона” мухлисларини стадионга олиб кетаётган автобус йўлда ёнғинга учраган. Гувоҳлар айтишича, ёнғиннинг сабаби автобус ичида ёқилган фаерлар бўлган. Ёнилғи тизимига ўт олган олов қисқа вақт ичида бутун салонни қамраб олган.

Ҳодиса оқибатида жиддий жароҳат олганлар ҳақида маълумот берилмаган, аммо мухлислар эвакуация қилинган ва ўйинга кечикишган. “Ян Брейдел” стадиони атрофида хавфсизлик чоралари кучайтирилган.

“Барселона” клуби воқеага муносабат билдириб, мухлисларнинг ҳолати ҳақида қуйидагича баёнот берди:

– Клуб “Брюгге” шаҳрида фаерлар билан боғлиқ муаммо туфайли мухлислар учун ажратилган автобус бекор қилинганини маълум қилади. Энди улар ўз манзилларига мустақил равишда етиб олишларига тўғри келади, – дейилади расмий хабарда.

Каталония клуби бу ҳолатни афсус билан қайд этди ва келгуси сафарларда мухлислар хавфсизлиги учун қатъий чоралар кўришини маълум қилди.

Шу билан бирга, “Барселона” майдонда ҳам, майдон ташқарисида ҳам тинчлик ва масъулият маданиятини сақлаш зарурлигини таъкидлади.

Шундай қилиб, “Брюгге”даги дуранг спорт нуқтаи назаридан муҳим бўлган бўлса, автобусдаги ёнғин воқеаси мухлислар хотирасида узоқ сақланадиган воқеага айланди.