Эрлинг Холанд АПЛ тарихида иккинчи натижани қайд этди
"Манчестер Сити" ҳужумчиси Эрлинг Холанд яна бир бор ўз маҳоратини намойиш этди — бу сафар "Ливерпул"га қарши ўйинда. Норвегиялик футболчи якшанба куни бўлиб ўтган учрашувнинг 13-дақиқасида пенальтини голга айлантира олмади, бироқ 29-дақиқада тўпни ўйиндан киритиб, хатони тўғрилади.
Opta маълумотларига кўра, Холанд АПЛнинг дастлабки 11 турида 14 та гол урди. Бу мусобақа тарихидаги иккинчи энг яхши кўрсаткич бўлиб, у фақат ўзининг 2022/23 йилги рекордидан (17 гол) ортда қолмоқда.
Эрлинг Холанд АПЛ 2025/26 мавсумида тўпурарлар рўйхатида яққол етакчилик қилмоқда ва энг яқин таъқибчи Игор Тиягодан олти голга олдинда.
"Манчестер Сити" эса турнир жадвалида иккинчи ўринни эгаллаб турибди ва "Арсенал" билан бўлган фарқ тўрт очкони ташкил этади.