Роналду 2026 йилги Жаҳон чемпионати ҳақида гапирди

40 ёшли Саудия Арабистонининг "Ал-Наср" клуби ҳужумчиси ва Португалия терма жамоаси етакчиси Криштиану Роналду 2026 йил ёзида бўлиб ўтадиган навбатдаги Жаҳон чемпионати ҳақида фикр билдирди.

"Бу менинг сўнгги Мундиалимми? Албатта, шу чемпионат менинг учун сўнггиси бўлади, ахир турнир вақтида мен 41 ёшда бўламан. Ушбу лаҳзадан максимал даражада завқ олиш ниятидаман", — деди Роналду дея унинг сўзларини келтиради "Mundo Deportivo" нашри.

Эслатиб ўтамиз, Жаҳон чемпионати Шимолий Америка қитъасида ўтказилади. Турнирга АҚШ, Канада ва Мексика мезбонлик қилади.

Криштиану Роналду Португалия терма жамоаси сафида 225 ўйинда майдонга тушган. У 143 та гол уриб, 46 та голли узатма амалга оширган. Футболчи терма жамоада 2003 йилнинг ёзидан буён ўйнаб келмоқда.