Карвахал орзусидаги "идеал футболчи"ни Мадрид юлдузларидан тузди

Мадриднинг номдор ҳимоячиси, Испания миллий термасининг тажрибали аъзоси Дани Карвахал яқинда блогер Дави Суарес билан қизиқарли суҳбатда иштирок этди. Ушбу мулоқот давомида блогер ундан “идеал футболчи”ни тасаввур қилиб, турли сифатларни турли ўйинчилардан “йиғиб бериш”ни сўради.

Энг қизиғи шундаки, Карвахал ҳар бир мезон бўйича айнан «Реал»да бирга тўп тепган жамоадошларини танлади. Бу эса Мадрид клубидаги авлоднинг қай даражада кучли бўлганини яна бир бор тасдиқлади.

Чап оёқ — Хамес Родригеснинг маҳоратли зарбалари

Карвахалга кўра, чап оёқдаги энг юқори даражадаги маҳорат Хамес Родригесда бўлган. Унга кўра, колумбиялик маэстронинг чап оёғи керакли вазиятда ҳам аниқлик, ҳам куч, ҳам креативликни тақдим этади.

Ўнг оёқ — Тони Крооснинг беназир аниқлиги

Ўнг оёқ десангиз — бу албатта Тони Кроос. Карвахалга кўра, немис плеймейкерининг оёғидан чиққан ҳар бир пас ўлчов билан берилганидек аниқ ва ўйин ритмини назорат қилиб туради.

Тезлик — Гарет Бэйлнинг чаққон парвозлари

Тезлик борасида ҳеч қандай шубҳа йўқ — бу Гарет Бэйл. Карвахал ўша даврларда Бэйлнинг қанотдан учиб ўтиши, рақибни бир зумда ортда қолдириши ҳақида ҳайрат билан гапирди.

Жисмоний куч — Серхио Рамоснинг қатъияти

Жисмоний куч ва жанговор руҳ масаласида Карвахал уни ҳеч кимга тенг қўймади — Серхио Рамос. “У билан рақобатда ютолмайман”, — дейди ҳимоячи. Рамоснинг майдондаги жасорати ва қаттиққўллиги жамоа учун доим таянч бўлиб келган.

Техника — Марселонинг майдондаги сеҳри

Техникага келганда эса Карвахал Марселони танлади. Бразилиялик ҳимоячининг ақлбовар қилмас финтлари, шиддат билан ҳужумга қўшилиши ва ўйинни бир зумда ўзгартира олиши барчага яхши маълум.

Менталитет — Роналдунинг темир иродаси

Менталитет сўзи айтилиши билан Карвахалнинг ёдига дарров Криштиану Роналду келди. Унга кўра, Роналдунинг меҳнатсеварлиги, ғалабага ташналиги ва ҳар бир ўйинда максимал фойда беришга интилгани ҳақиқий чемпион руҳини акс эттиради.

Футбол интеллекти — Модричнинг ўйинни ҳис этиши

Охирги сифати — интеллектуал ўйин, яъни футбол ақли. Бу борада Карвахал ҳеч иккиланмасдан Лука Модрични танлади. Унга кўра, хорват маэстроси ўйинни олдиндан сезиши, вазиятни бир сонияда англаб тўғри қарор қабул қилиши билан ажралиб туради.

Карвахалнинг мавсумдаги ҳолати

Маълумот учун, 33 ёшли Дани Карвахал бу мавсум бир қатор жароҳатлар туфайли Ла Лигада атиги 7 та ўйинда иштирок этди. Шунга қарамай, у ҳали ҳам жамоа учун муҳим тажрибали футболчи ҳисобланади.

Мухлислар учун эса бу суҳбат яна бир бор «Реал»нинг охирги ўн йилликда қандай улкан истеъдодларга эга бўлганини эслашга сабаб бўлди.