Зеедорф Англия грандлари таклиф қилганини маълум қилди

"Милан" ва Нидерландия терма жамоасининг собиқ футболчиси Кларенс Зеедорф Англия чемпионати клубларига ўтиши амалга ошмаганини эслаб ўтди. "Премьер-лига жамоалари бир неча бор менга қизиқиш билдирган.

'Аякс'дан кетганимдан сўнг, 'Манчестер Юнайтед' ва 'Арсенал'дан таклифлар олганман. Бу икки клуб менга 'Сампдория'дан кетганимдан кейин ҳам, 'Реал'га ўтишимдан аввал ҳам қизиқиш билдирган.

'Реал'дан кетганимдан сўнг эса 'Интер'ни танладим, бироқ 'Арсенал' ва 'Манчестер Юнайтед' яна таклиф юборган эди. Балким, АПЛнинг бошқа клублари ҳам мени таркибга қўшишни истагандир.

Ўша пайтда Италия чемпионати худди ҳозирги АПЛ каби машҳур эди. Афсуски, Англияда ўйнаш насиб этмади.

Лекин, бу ҳолатда менинг фаолиятим қандай кечишини ҳеч ким билмайди", – дея Зеедорфнинг сўзларини келтиради Prime Video Sport. Кларенс Зеедорф ўз фаолияти давомида 'Аякс', 'Сампдория', 'Реал', 'Интер', 'Милан' ва 'Ботафого' клубларида тўп сурган.

Голландиялик футболчи 2014 йилда фаолиятини якунлаган.