«Қамоқ курорт эмас»: Жапаров ҳибсхонадаги йилларини эслади

Қирғизистон етакчиси тергов ҳибсхоналаридаги шароитлардан нолиётганларга шахсий тажрибаси билан жавоб қайтарди.

Қирғизистон Президенти Садир Жапаров тергов ҳибсхоналаридаги шароитлар бўйича билдирилаётган эътирозларга муносабат билдириб, панжара орти «курорт эмаслигини» таъкидлади. Бу ҳақда Tengrinews.kz нашри хабар бермоқда.

Давлат раҳбари ўзининг сиёсий фаолияти давомида икки бор ҳибсда бўлганини эслаб ўтди:

«Мен ўзим тергов ҳибсхонасида жами тўрт ярим йил ўтирганман: биринчи сафар тўққиз ой, иккинчисида эса уч ярим йил. Бирор марта шикоят қилдимми? Йўқ! Чунки бу ер тергов изолятори эканини тушуниб, ҳаммасига сабр қилганман», — деди Жапаров.

Президентнинг сўзларига кўра, бугунги кунда мамлакат жазони ижро этиш тизимида катта ислоҳотлар амалга оширилган. Илгари қамоқхоналарда коррупция гуллаган бўлса, ҳозир вазият тубдан ўзгарган:

- Маҳбуслар кунига уч маҳал бепул иссиқ овқат билан таъминланмоқда;

- Мавсумга мос махсус кийим-бош (форма) берилмоқда;

- Маҳкумлар меҳнат билан банд бўлиб, топган даромадларини оилаларига жўнатиш имкониятига эга.

Садир Жапаровга нисбатан асосий жиноий иш 2013 йилдаги Иссиқкўл воқеалари сабаб қўзғатилган эди. У 2020 йилдаги халқ ғалаёнлари пайтида озодликка чиқди ва 2021 йилда мамлакат Президенти этиб сайланди.