Путин 2026 йилни қандай ном билан атагани маълум бўлди
Россия президенти Владимир Путин 2026 йилни мамлакат миқёсида муҳим рамзий аҳамиятга эга давр сифатида белгилаб, уни «Россия халқлари бирдамлиги йили» деб эълон қилди. Бу ташаббус Россиядаги кўп миллатли жамиятда ўзаро ҳурмат, ҳамжиҳатлик ва барқарорликни янада мустаҳкамлашга қаратилган.
Маълум қилинишича, мазкур номни жорий этиш таклифи президентга Бутунроссия казаклар жамияти атамани Виталий Кузнецов томонидан илгари сурилган. Давлат раҳбари ушбу ғояни қўллаб-қувватлаб, Россияда миллатлараро ва динлараро муносабатлар сўнгги йилларда ижобий йўналишда ривожланаётганини алоҳида таъкидлади.
Путиннинг қайд этишича, ҳозирги кунда Россия ҳудудида 190 дан ортиқ миллат ва элат вакиллари, шу жумладан, тубжой кичик ва автохтон халқлар истиқомат қилади. Ана шу хилма-хиллик мамлакатнинг бойлиги сифатида баҳоланиб, уни асраш ва ривожлантириш давлат сиёсатида устувор йўналиш бўлиб қолмоқда.
Шу билан бирга, президент яна бир муҳим ташаббусни илгари суриб, 2027 йилни «География йили» деб эълон қилиш таклифини билдирди. Унинг сўзларига кўра, айнан шу даврда Россия тарихи ва ҳудудий ривожи билан боғлиқ бир қатор муҳим географик юбилейлар нишонланади.
Бу қарорлар Россия жамиятида миллий бирдамлик, тарихий мерос ва умумий қадриятларга бўлган эътиборни янада кучайтиришга хизмат қилиши кутилмоқда.