Ўзбекистонда 4000 км халқаро стандартдаги автобанлар қурилади
Президент Шавкат Мирзиёев Олий Мажлис ва халққа мурожаатида транспорт инфратузилмасини тубдан янгилашга қаратилган беш йиллик катта дастур старт олишини маълум қилди. Асосий мақсад — мамлакатнинг транзит салоҳиятини ошириш ва иқтисодий ўсишга кучли туртки бериш. Бу ҳақда upl.uz хабар беради.
Давлат раҳбари БМТ таҳлилларига таяниб, сифатли йўллар ЯИМга бевосита таъсир кўрсатишини, иқтисод камида 2% ўсишини таъкидлади. Шу боис республиканинг энг муҳим йўл артериялари мақоми қайта кўриб чиқилиб, умумий 4 минг километр магистрал замонавий, халқаро талабга мос “автобан”ларга айлантирилади.
Янгиланиш мамлакат ҳудудларини боғлайдиган стратегик йўналишлардан бошланади. Устувор рўйхатда Андижон–Қўнғирот ҳамда Тошкент–Термиз трассалари бор, шунингдек Самарқанд–Шаҳрисабз ва Алат–Сариосиё йўллари ҳам модернизациядан ўтади.
Мавжуд йўлларни реконструкция қилиш билан бирга, мутлақо янги инфратузилма ҳам қурилади — 800 километр юқори тезликка мўлжалланган пуллик йўллар барпо этилиши кўзда тутилган. Лойиҳа пойтахтни йирик ҳудудий марказлар ва туристик йўналишлар билан боғлайди: Тошкент–Самарқанд, Тошкент–Андижон ва Тошкент–Бўстонлиқ йўналишларида пуллик участкалар пайдо бўлади, шунингдек Пунган–Наманган ҳамда Қарши–Шаҳрисабз кесимларида ҳам ишлар олиб борилади.
2026 йилги режаларга кўра, яна 300 километр умумий фойдаланишдаги йўллар қайта таъмирланади. Техника Қорақалпоғистон Республикаси, Бухоро, Қашқадарё ва Сурхондарё вилоятларидаги энг долзарб участкаларга кириб боради.
Мирзиёев шаҳар ва шаҳарлараро муҳитни режалаштиришга ёндашув ҳам ўзгаришини алоҳида қайд этди. Энди қонунчилик даражасида лойиҳачилар аҳоли фикрини инобатга олишга мажбур бўлади, транспорт оқимининг экологияга таъсири баҳоланади ва пиёдалар учун қулай “тўсиқсиз” муҳит яратиш талаб этилади.
Маълумот учун, дунёдаги энг узун автомобиль йўли — қарийб 30 минг километрли Панамерика шоссеси. Бироқ Ўзбекистон иқлимида қишда -20, ёзда +50 даражагача кескин ўзгарадиган ҳароратлар сабаб узоқ хизмат қиладиган автобанлар қуриш учун асфальтнинг қуёшда юмшаб кетишини олдини оладиган махсус полимер-битум боғловчи материаллардан фойдаланиш зарурлиги таъкидланди.