Smartlet ремешоги механик ва ақлли соатни бирлаштиради

Парижлик Smartlet стартапи ақлли соатни механик соат остига яшириш имконини берувчи икки қаватли ремешокни тақдим этди, деб vc.ru хабар берди. Янги маҳсулот Лас-Вегасда ўтган Consumer Electronics Show кўргазмасида намойиш қилинди.

Ремешок зангламайдиган пўлатдан ишланган бўлиб, унга бир вақтнинг ўзида механик соат ҳамда ақлли соат ёки фитнес-трекер ўрнатиш мумкин. Маҳсулот классик соат кўриниши ва рақамли имкониятларни бирлаштиришни хоҳловчилар учун мўлжалланган.

Smartlet ремешоги Apple Watch, Samsung Galaxy Watch, Google Pixel Watch, Garmin, Fitbit Charge ва Whoop қурилмалари билан мос келади. Механик соатлар эса 18–24 мм кенгликда бўлиши керак, Rolex, Omega, Tudor ва TAG Heuer моделлари ҳам мос ҳисобланади.

Ремешок нархи 418 доллар бўлиб, бу тахминан 5,2 миллион сўмни ташкил этади. Cnet’га кўра, маҳсулот бой мижозларга қаратилган бўлса-да, у амалда анча оғир бўлиши ва пастда жойлашган экран тезроқ тирналиши мумкин.