Chanel “калиш”ни кашф этдими? Ўзбекона пойабзал жаҳон модасида!

Интернетда машҳур Chanel бренди ўзбекларга жуда таниш бўлган калишларни расмий равишда сотувга чиқаргани ҳақидаги хабарлар кенг муҳокамага сабаб бўлди. Аввалига бу маълумот кўпчиликка ҳазилдек туюлади. Аммо суратларга синчиклаб назар ташласангиз, болалигимиздан йод бўлиб кетган — ўша таниш калишлар эканини кўрасиз.

Фарқи шундаки, Chanel бу пойабзални “лакланган лоферлар” деб атаяпти. Дизайни замонавий, кўриниши мода талаблари асосида безатилган, мақоми эса — премиум. Нархи-чи? Оддий калиш эмас, деярли осмон билан беллашади.

Энг қизиқ жиҳати шундаки, Ўзбекистонда бу турдаги калишларни жуда арзон нархда топиш мумкин. Аммо жаҳон бренди қўлида у бутунлай бошқа қиймат, бошқа мақом касб этмоқда.

Бу ҳолат шуни кўрсатадики, аждодларимиз ҳақиқий қулайлик ва услуб нима эканини аллақачон билишган. Дунё эса бу ҳақиқатни эндигина англай бошлаётгандек. Баъзан мода дегани янгилик эмас — у аллақачон мавжуд бўлган қадриятларнинг қайта кашф этилишидир.