«Челси» янги бош мураббий бўйича музокараларни жадаллаштирди
«Челси» 2026 йилни Энсо Марескани истеъфога чиқариш билан бошлади — лондонликлар мураббий билан хайрлашганини пайшанба куни расман эълон қилди. Энди «аристократлар»нинг навбатдаги бош мураббийи «Страсбург»ни бошқараётган Лиам Розеньор бўлиши эҳтимоли тобора кучаймоқда. Бу ҳақда euro-football.ru хабар беради.
L’Equipe хабарига кўра, «Челси» ва «Страсбург» ўртасида Розеньор масаласидаги музокаралар кескин фаоллашган. Мутахассиснинг Лондон клубига кўчиб ўтиши деярли муқаррар кўринмоқда, «Челси» эса мураббий учун француз томонига компенсация тўлаши қайд этилган.
Айни пайтда «Челси» Англия Премьер-лигаси жадвалида бешинчи ўринда бормоқда. Якшанба куни «аристократлар» сафарда «Манчестер Сити»га қарши майдонга тушади.