Ўзбекистон—Тожикистон чегарасида логистика маркази қурилиши режалаштирилмоқда

Ўзбекистон—Тожикистон давлат чегарасида янги логистика марказини барпо этиш режалаштирилмоқда. «Ховар» агентлиги хабарига кўра, лойиҳа учун асосий жой сифатида «Ўйбек — Фотехобод» чегара-ўтказиш пункти атрофидаги ҳудуд кўриб чиқилмоқда. Бу ҳақда kursiv.uz хабар беради.

Ҳозирда тайёргарлик ишлари олиб борилмоқда: жумладан, марказнинг иқтисодий самарадорлиги баҳоланмоқда. Бу босқичлар Евросиё тараққиёт банки (ЕТБ)нинг техник ёрдам жамғармаси молиявий кўмагида амалга оширилаётгани айтилади.

Ташаббус Тожикистоннинг транспорт соҳасида давлат-хусусий шериклик (ДХШ) механизмини илк бор синовдан ўтказиш тажрибаси бўлиши кутилмоқда. ЕТБ вакилларига кўра, янги логистика тугуни юк ташиш жараёнларини янада оптималлаштиришга хизмат қилиши мумкин.

Аввалроқ икки давлат «Ўйбек — Фотехобод» пункти ҳудудида логистика ва ишлаб чиқариш инфратузилмасини ўз ичига олган савдо-саноат зонасини ташкил этиш имкониятини ҳам муҳокама қилган эди.