"Заковат"да 17 ёшли йигитга энг яхши саволи учун автомобил берилди
“Заковат” интеллектуал ўйинининг 25 йиллик юбилейи доирасида ўтган мавсум финали тарихий воқеа билан якунланди. Беллашувда берилган энг яхши савол муаллифи илк бор автомобил билан тақдирланди. Бу воқеа мамлакатда билим ва тафаккурга берилаётган эътиборнинг яна бир ёрқин намунасига айланди.
Йилнинг энг яхши билимдони деб топилган 17 ёшли Муҳаммаджон Махадалиев Алишер Навоий ҳақидаги чуқур ва мазмунли саволи билан ҳакамлар эътирофига сазовор бўлди. Натижада у электромобил кроссовер эгасига айланди. Ушбу мукофот томошабинлар ва билимдонлар орасида катта қизиқиш уйғотди.
Муҳаммаджон Тошкент вилояти Қибрай туманида истиқомат қилади ва Тошкент шаҳридаги Турин политехника университетида таҳсил олади. Ёш бўлишига қарамай, у ўзининг билимга чанқоқлиги ва изланиши билан ажралиб турди. Унинг ютуғи кўплаб тенгдошларига ўрнак бўлиши қайд этилмоқда.
Мутасаддилар бундай рағбатлантиришлар ёшлар орасида билимга қизиқишни янада оширишига ишонч билдирмоқда. Муҳаммаджон Махадалиевнинг ютуғи эса Ўзбекистонда интеллектуал салоҳият юқори баҳоланаётганининг ёрқин тасдиғи бўлди.