Росеньорнинг илк трансфер талаби: "Челси"га Трент жудаям керак экан...

“Челси”да янги давр бошланиши билан трансфер бозори атрофидаги гап-сўзлар ҳам тез қизий бошлади. Лондонликларнинг янги бош мураббийи Лиам Росеньор клуб раҳбариятига аллақачон кадрлар масаласида мурожаат қилгани ҳақида хабарлар тарқалмоқда.

Fichajes нашри маълум қилишича, Росеньор “Челси” сафига “Реал” ҳимоячиси Трент Александр-Арнольдни олиб келиш вариантини кўриб чиқишни сўраган. Мураббийнинг қарашича, ушбу футболчи “аристократлар”нинг ўйин услубига жуда мос тушади ва жамоага тактик жиҳатдан янги имкониятлар бера олади.

Нега айнан Трент?

Хабарларда таъкидланишича, Росеньор тизимида қанотлардан тезкор ҳужум қуриш, пас маданиятини ошириш ва ҳимоядан тўпни ақлли чиқариш катта аҳамиятга эга. Шу нуқтаи назардан қараганда, Трент каби фаол, ҳаракатчан ва ўйинни “ўқий оладиган” ҳимоячи мураббий режасида муҳим бўлак сифатида кўрилмоқда.

Ижарами ёки тўлиқ трансфер?

Манбага кўра, “Челси” футболчини тўғридан тўғри сотиб олиш эмас, балки сотиб олиш ҳуқуқи билан ижарага олиш варианти устида ишламоқчи. Бундай йўл клуб учун ҳам хавфни камайтиради, ҳам молиявий жиҳатдан қулайроқ кўринади.

Бироқ бу ерда асосий тўсиқ бор: “қироллик клуби” футболчини қўйиб юборишни истамаётгани айтилмоқда. Демак, музокаралар бўлса ҳам, осон кечмаслиги мумкин.

Росеньор даври қандай старт оляпти?

Эслатиб ўтамиз, кеча “Челси” Лиам Росеньорни жамоага янги бош мураббий этиб тайинлаганини расман эълон қилди. Лондон клуби англиялик мутахассис билан 2032 йилгача мўлжалланган узоқ муддатли шартнома имзолади.

Шунинг учун Росеньорнинг илк қадамларидан бири трансфер стратегиясини белгилаш бўлиши табиий. Энди эса савол битта: бу хоҳиш оддий “рўйхатдаги исм” бўлиб қоладими ёки “Челси” ҳақиқатан ҳам йирик битим сари қадам ташлайдими? Мухлислар эса, одатдагидек, расмий хабарни кутяпти.