Рафинья Флик бўлмаганда «Барселона»ни тарк этишини айтди
«Барселона» вингери Рафинья Диас сўнгги муваффақиятлари ҳақида гапирар экан, бош мураббий Ханс-Дитер Фликнинг ролини алоҳида таъкидлади. Бу ҳақда euro-football.ru хабар беради.
Бразилиялик футболчи Испания Суперкубоги финалида Мадриднинг «Реал»ига қарши ўйинда дубл қайд этиб, учрашув қаҳрамонига айланди. Беллашув 3:2 ҳисобида якунланди.
«Агар Флик бўлмаганда, мен аллақачон “Барса”дан кетган бўлардим. У ҳаммасини ўзгартирди. Менда жамоа учун муҳим ўйинчини кўраётганини айтди. Ҳар бир футболчига айнан шундай ишонч керак», — дея 29 ёшли ҳужумкор футболчининг сўзларини келтиради «Газета.Ru», Barca Universal манбасига таяниб.
Флик 2024 йил ёзида «кўк-анорранглилар»ни қабул қилиб олиб, Хави Эрнандес ўрнини эгаллаган эди. Ўша даврда Рафиньянинг клубдан кетиши мумкинлиги ҳақида ҳам фаол гап-сўзлар тарқалган.