Тибо Куртуа Суперкубок финалидаги мағлубиятни изоҳлади
“Реал Мадрид” дарвозабони Тибо Куртуа Испания Суперкубоги финалида “Барселона”дан учралган ютқазишдан кейин ўйин тафсилотлари ва жамоанинг ҳозирги ҳолати ҳақида фикр билдирди.
Белгиялик посбоннинг таъкидлашича, принципиал рақибга айнан финалда мағлуб бўлиш ҳар доим оғир қабул қилинади. Шу билан бирга, у жамоа энди бутун эътиборни ички мусобақаларга қаратган ҳолда Ла Лига ва Кубокда курашни давом эттириши лозимлигини айтди.
Куртуа фикрича, ушбу учрашувда майда деталлар ҳал қилувчи аҳамият касб этган. Унинг сўзларига кўра, охирги ойларда “Реал” ўйинида кўп ҳолатлар кутилгандек кечмаяпти ва бу финалда ҳам ўз аксини топди. Дарвозабон жамоа бу ўйинни ғалаба билан якунлаши мумкин бўлганини ҳам алоҳида таъкидлади.
"Принципиал рақибга финалда ютқазиш ҳамиша ноқулай. Энди эътиборни Ла Лига ва Кубок учун ишга қаратсак керак. Бугунги ўйинда деталлар биз тарафда бўлмади — бу сўнгги ойларда кўп нарса кутилгандек бўлмаётган давр. Биз бу учрашувни ғалаба билан якунлашимиз мумкин эди.", — деди Куртуа.
У биринчи таймда жамоа ҳимояда жуда чуқур ўйнаганини, иккинчи бўлимда эса рақибнинг суръати пасайиб, “Реал”да бир қатор яхши имкониятлар юзага келганини қайд этди. Бироқ ҳал қилувчи паллаларда тўп дарвоза тўрига бориб уланмади.
Куртуа биринчи гол урилган вазиятда хатога йўл қўйилганини, учинчи гол эса рикошет орқали кириб кетганини эслатди. Унинг фикрича, айнан шундай майда жиҳатлар катта ўйин тақдирини белгилаб беради. Шунингдек, дарвозабон кўплаб зарбалар рақиб посбони Жоан Гарсия томонидан қайтарилганини ҳам айтди.
Винисиус Жуниор ҳақида гапирар экан, Куртуа жамоа бразилиялик ҳужумчига тўлиқ ишонишини билдирди. У Винисиуснинг салоҳияти жуда юқори эканини, айниқса унинг финалда урган голи ҳақиқий санъат асари бўлганини таъкидлади.
Сўзининг якунида Тибо Куртуа “Реал Мадрид” Ла Лига, Чемпионлар Лигаси ва Кубокда курашни давом эттириши шарт эканини, мавсум ҳали олдинда эканини урғулаб ўтди.
"Биз унга ишонамиз ва нималарга қодирлигини биламиз. У жуда иқтидорли йигит, айниқса унинг голини айтар эканман — у ҳақиқий шедевр эди. Шунингдек, жамоа Ла Лигада, Чемпионлар Лигаси ва Кубокда курашишни давом эттириши керак", — деди Куртуа Movistar эфирида.