Рафинья Суперкубокдан сўнг: «Флик менинг тақдиримни ўзгартирди»

«Барселона» вингери Рафинья Диас Суперкубок финалидаги ғалаба ва ўзи намоён этган ўйиндан кейин фикрлари билан ўртоқлашди. Бразилиялик футболчи ушбу баҳсни жорий мавсумдаги энг ёрқин чиқишларидан бири сифатида баҳолади.

— Ростини айтсам, бу ўйин мен учун мавсумдаги энг яхши баҳс ва энг ёқимли лаҳзалардан бири бўлди. Мен доим жамоа учун охиригача курашишга, ҳимояда ишлашга ва ҳужумда фойдали бўлишга ҳаракат қиламан. Бизда ёш футболчилар жуда кўп ва тўғри фикрлаш, ҳар бир учрашувда ғалаба учун майдонга чиқиш клуб манфаати учун ниҳоятда муҳим, — деди Рафинья.

Унинг таъкидлашича, «Барселона» сафида тўп тепаётган ҳар бир футболчида ягона мақсад бўлиши шарт — титуллар ютиш. — Бу футболкани кийган эканмиз, олдимизда фақат совринлар бўлиши керак. Биз айнан шу йўлдан кетяпмиз, — дея қўшимча қилди вингер.

Шунингдек, Рафинья Класикодаги ҳал қилувчи паллаларга алоҳида тўхталди. У иккинчи бўлимда жамоа бир бутун механизм каби ҳаракат қилганини эътироф этди. — Иккинчи таймда биз бир тан-у бир жон бўлиб ўйнадик. Менимча, Ханс Флик учун керак бўлган ишни бажардик, — деди у.

Энг қизиқ жиҳат — футболчи мураббий Ханс Фликнинг келиши унинг «Барселона»даги келажагини сақлаб қолганини очиқ тан олди. — Агар Флик келмаганида, эҳтимол жамоадан кетган бўлардим. У ҳаммасини ўзгартирди, менга ишонди ва жамоада муҳим роль ўйнашимни айтди. Футболчи учун бундан катта мотивация бўлмайди, — деди Рафинья.

Маълумот ўрнида айтиш жоиз, Рафинья жорий мавсумда барча мусобақаларда 17 та учрашувда майдонга тушиб, жамоаси учун муҳим фигурага айланиб улгурди. Олдинда эса янада катта мақсадлар ва янги зафарлар кутмоқда.