Андижонда қурол ва пичоқ билан таҳдид қилиб, пул олган жиноий гуруҳ ушланди

Андижон шаҳрида қурол ва ўткир тиғли буюмлар билан таҳдид қилиб, фуқаролардан катта миқдорда пул ҳамда криптовалюта ундириб келган уюшган жиноий гуруҳ қўлга олинди. Бу ҳақда вилоят ИИБ ахборот хизмати хабар берди.

Маълумотларга кўра, гуруҳ аъзолари криптоактивлар билан шуғулланувчи шахсни кузатиб, ўзларини ҳуқуқни муҳофаза қилувчи орган ходимлари сифатида таништирган. Улар жабрланувчини супермаркет олдига чақириб, Damas автомашинасига ўтқазган ва “ноқонуний криптофаолият” учун жиноий жавобгарлик билан қўрқитган.

Таҳдид ва босим орқали жабрланувчидан криптоҳамёнга 100 минг АҚШ доллари ўтказдирилган. Шунингдек, текширувда гуруҳ аъзоларидан бири аёл кишига зўравонлик қўллаб, қимматбаҳо телефонини тортиб олгани ва 10 миллион сўм талаб қилгани ҳам аниқланган.

Ҳолат юзасидан товламачилик ва босқинчиликка оид моддалар билан жиноят ишлари қўзғатилди. Гуруҳнинг икки аъзоси — Минҳожиддин Алимов (“Ҳожи”) ва Абдумалик Шокиров (“Муфтий”) чет элда экани айтилмоқда, уларга нисбатан қидирув эълон қилинган. Қолганлари ушланган.

ИИБ жабрланганларни 102 рақами орқали мурожаат қилишга чақириб, мурожаатчилар шахси махфий сақланишини билдирди.