Гвардиола дербидаги мағлубиятдан сўнг: “Бизда энергия етишмади”
Англия Премьер-лигасининг 22-тури доирасидаги марказий баҳслардан бири Манчестер дербисида “Манчестер Сити” сафарда ўз ҳамшаҳари “Манчестер Юнайтед”га 0:2 ҳисобида имкониятни бой берди. Учрашувдан кейин “шаҳарликлар” бош мураббийи Хосеп Гвардиола ўйинга баҳо бериб, жамоасида ҳал қилувчи жиҳат — энергия ва зарур кайфият етишмаганини очиқ айтди.
Испаниялик мутахассиснинг таъкидлашича, “Олд Траффорд”да кўп марта ўйнаган бўлса-да, бугунги дербида ғалаба учун талаб қилинадиган даражада ҳаракат қила олишмаган.
“‘Манчестер Юнайтед’да бизда бўлмаган жиҳат бор эди. Бу стадионга кўп келганман, аммо бугун бундай ўйинларда ғалаба қозониш учун керакли даражада эмас эдик. Тўрт кун олдин ‘Ньюкасл’га қарши баҳсда ўша энергия бор эди, бугун эса йўқ”, — деди Гвардиола.
Мураббий ўйиннинг ўзи жуда ёмон бўлмаганини, аммо натижа қониқарли чиқмаганини қайд этди. Унинг фикрича, рақиб бу гал “Сити”дан кўра уюшқоқ ва ғайратлироқ ҳаракат қилган.
“Ўйинимиз ёмон эмасди, лекин керакли натижага чиқа олмадик. Бу футболда бўлиб туради. Оддий ўйин эди ва рақиб биздан яхшироқ ҳаракат қилди. ‘МЮ’да янги мураббий бор ва дербида бизда етишмаган энергияни айнан улар кўрсатишди”, — дея қўшимча қилди у.
Гвардиола шунингдек, сўнгги икки трансфер ойнасида таркиб сезиларли янгиланганини эслатиб, бундай ўзгаришларга мослашиш талаб этилишини таъкидлади. Унинг айтишича, асосий хавотири — жамоа кўпроқ очко йиғиши масаласи.
“Охирги икки трансфер ойнасида таркибни анча ўзгартирдик, бунга мослашишимиз керак. Мен кўпроқ очколар тўплаш ҳақида ўйлаяпман. Албатта, кўпроқ гол уриш ҳам яхши бўларди. Сўнгги 12 ойда жамоа анча янгиланди, лекин руҳий ҳолат барибир юқори”, — деди мураббий.
Мураббий сўзларида сўнгги ўйинлардан мисол ҳам келтирди: айрим баҳсларда “Сити” ўз даражасини кўрсата олмаган, айримларида эса ўйин яхши бўлса-да, голлар етишмаган.
“Бугун биз ўз даражамизни чиқара олмадик. Лекин ‘Сандерленд’га қарши ўйинда ажойиб ҳаракат қилган эдик. ‘Брайтон’ ва ‘Челси’га қарши баҳсларда эса яхши ўйнаб, ғалаба учун керакли голларни ура олмадик”, — деди Гвардиола.
Ёш футболчи Макс Аллейн ҳақида ҳам алоҳида тўхталган мураббий, унинг сўнгги ўйинлардаги ижобий ҳаракатини мақтади, бироқ бугунги бошланғич эпизодларда мағлуб бўлганини табиий жараён сифатида баҳолади.
“Макс охирги икки ўйинда жуда яхши кўринди. Бугун эса, албатта, биринчи икки эпизодда ютқазди. Лекин айнан шундай тажрибалар ёш футболчилар учун энг кераклиси — шу орқали улар пишади. Масалан, ‘Ньюкасл’га қарши ўйинда у ажойиб, ҳақиқатан ҳам жуда яхши эди”, — деди у.
Марқ Гехининг “Манчестер Сити”га эҳтимолий трансфери мавзусида эса Гвардиола ҳозирча расмий маълумотга эга эмаслигини айтди:
“Бу ҳақда ҳали клубдан расман маълумот олганим йўқ. Агар аниқ бўлса, сизлар билан бир вақтда билиб оламан. Айтишларича, келишув яқин, аммо ҳозиргина Ферран Сориано ва Уго Виана билан гаплашдим — улар бу ҳақда ҳеч нарса айтишмади”, — деди мутахассис.
Маълумот учун, Манчестер дербисида ўзбекистонлик ҳимоячи Абдуқодир Ҳусанов “Манчестер Сити”нинг асосий таркибида майдонга тушиб, учрашувни тўлиқ 90 дақиқа ўтказди.