«28 йил ўтгач: Суяклар ибодатхонаси» АҚШда илк фильмга нисбатан сустроқ старт олди
«28 йил ўтгач: Суяклар ибодатхонаси» фильми АҚШ кинотеатрларида кутилганидан пастроқ натижа қайд этди. Hollywood Reporter маълумотига кўра, картина дастлабки уч кун ичида 13 миллион доллар йиғди.
Таққослаш учун, ўтган йил июнида чиққан биринчи қисм прокатни 30 миллион доллар билан бошлаган эди. Мутахассислар янги фильм кассасига икки релиз оралиғининг жуда қисқа бўлгани таъсир қилганини айтмоқда: давоми илк қисмдан атиги ярим йил ўтиб тақдим этилган.
Шунга қарамай, Рейф Файнснинг иштироки ва Киллиан Мерфининг кутилмаган чиқиши кейинги ҳафталарда фильмга барқарор томошабин оқимини таъминлаши мумкин. Sony эса трилогияни якунлаш режасидан воз кечмаган.
Суратга олиш ишлари Англиянинг Нортумберленд графлиги ҳамда Йоркшир-Дейлз водийсида олиб борилган. Фильм учун у ерда суяклардан ясалган улкан ибодатхона декорацияси ҳам махсус барпо этилган.