Қорақалпоғистонда аёл поезд остида қолиб ҳалок бўлди
Қорақалпоғистонда темирйўлни белгиланмаган жойдан кесиб ўтиш оғир фожиага сабаб бўлди. Йўлни ўтиш учун мўлжалланмаган нуқтадан ўтмоқчи бўлган аёл йўловчи поезди остида қолиб, воқеа жойида ҳалок бўлган.
“Ўзбекистон темир йўллари” АЖ матбуот хизматига кўра, ҳодиса 2026 йил 22 январь куни Гидроузел ва Нукус станциялари оралиғида содир бўлган. Маълум қилинишича, жабрланувчи темирйўлдан рухсат этилмаган жой орқали ўтишга уринган ва йўловчи поезд ҳаракати вақтида хавфсизлик қоидаларига амал қилмаган.
“Жабрланувчи йўл ҳаракати қоидаларини бузиб, ўз хавфсизлигига етарли эътибор бермаган. Айни пайтда масъул хизматлар ҳодиса тафсилотларини ўрганмоқда”, дейилади расмий ахборотда.
Компания фуқароларга темирйўлларни фақат белгиланган ўтиш жойларидан кесиб ўтиш, огоҳлантирувчи белгилар ва қоидаларга қатъий риоя қилиш зарурлигини яна бир бор эслатган. Хабарда қайси йўналишда ҳаракатланаётган йўловчи поезд иштирок этгани бўйича аниқ маълумот берилмаган.
Эслатиб ўтамиз, январь ойи бошларида Хоразм вилоятининг Шовот туманида ҳам шунга ўхшаш ҳолат кузатилган: светофор ва йўл белгилари талабларига амал қилмасдан темирйўлни кесиб ўтган Cobalt автомашинасини поезд уриб юборган, ҳайдовчи тан жароҳатлари билан шифохонага ётқизилган эди.