Роналдусиз ғалабадан кейин Криштиану икки эмодзи қолдирди

Криштиану Роналду мураббий билан келишувга кўра ОФК Чемпионлар лигаси 2 гуруҳ босқичи ўйинларида майдонга тушмаяпти. Осиёдаги клублар ўртасидаги иккинчи даражали турнирда саудияликлар етакчисиз ҳам барқарор натижа кўрсатмоқда. Бу ҳақда euro-football.ru хабар беради.

Чоршанба куни «Ал-Наср» гуруҳдаги бешинчи учрашувини ҳам ютди: жамоа Тожикистонда «Истиклол»ни 4:0 ҳисобида йирик мағлуб этди.

Ўйиндан сўнг Роналду ижтимоий тармоқларда «Ал-Наср» гуруҳни биринчи ўринда якунлаб, кейинги босқичга чиққанлиги ҳақидаги хабарни репост қилди. Криштиану унга икки эмодзи — олов ва қарсаклар белгисини қўшди.

40 ёшли ҳужумчининг «Ал-Наср» билан амалдаги шартномаси 2027 йил ўрталаригача мўлжалланган.

Шунингдек, интернетда Криштиану Роналду ва Тожикистон билан боғлиқ сохта хабар муҳокама қилинмоқда.