«Фенербаҳче» собиқ футболчиси Моуринёни сўзида турмасликда айблади

«Фенербаҳче»нинг собиқ футболчиси Линкольн жамоани 2024–2025 йилларда бошқарган португалиялик мутахассис Жозе Моуриньо ҳақида кескин фикр билдирди. Бу ҳақда euro-football.ru хабар беради.

Футболчининг айтишича, Моуриньо унга берган ваъдасини бажармаган ва ўзини ҳурматсиз тутган. «У кўп ютуқларга эришган, буни ҳеч ким инкор этмайди. Лекин мен учун ҳаётда характер совринлардан муҳимроқ. Моуриньо мени ҳайратда қолдирди», — деди Линкольн Fanatik нашрига берган интервьюсида.

Линкольннинг сўзларига кўра, у «Халл Сити»га ижара асосида кетишидан олдин Моуриньо билан гаплашган ва мураббий уни ёзги йиғинда Португалияда кўришни хоҳлашини айтган. Мавсум якунлангач, у йиғинга чақирув кутган, бироқ алоқага чиқиш уринишлари натижа бермаган.

Футболчи таржимон орқали Моуриньо билан боғланмоқчи бўлганида, мураббий суҳбатдан бош тортиб, спорт директори билан гаплашишни айтган. Линкольннинг таъкидлашича, жамоа Португалияда бўлган пайтда у ҳам Португалияда уйида бўлган, шунга қарамай Моуриньо уни Истанбулга юбориб, алоҳида шуғулланишни буюрган.

«Менга нисбатан адолатсиз ва ҳурматсиз муносабат бўлди. Кўп ўйинларда ҳатто ўзимнинг позициямда ўйнамасам ҳам клубга ёрдам бериш учун боримни бердим. Оғир жароҳат олдим ва қўллаб-қувватлаш кутдим, аммо буни сезмадим. Мен бошқалар каби машҳур футболчи эмасман, лекин майдонда доим охиригача ишлаганман», — дея қўшимча қилди у.

Ҳозирда Жозе Моуриньо «Бенфика»ни бошқармоқда.