Хитой мандарини ва ананасига Ўзбекистонда вақтинча тақиқ киритилди

Ўзбекистонга Хитойдан олиб кирилаётган мандарин ва ананас партияларида ўсимликлар карантини объектлари тез-тез учраётгани сабаб, ушбу мевалар импортига вақтинчалик чеклов жорий этилди. Бу ҳақда Ўсимликлар карантини ва ҳимояси агентлиги маълум қилди.

Агентликка кўра, Хитойдан келган мандарин ва ананас юкларидан белгиланган тартибда намуналар олиниб, Марказий фитосанитария лабораториясида экспертизадан ўтказилган. Таҳлиллар натижасида намуналарда карантин остидаги зараркунандалар аниқланган.

Хусусан, қуйидаги зарарли организмлар қайд этилгани айтилмоқда: «Ситрус оқ-қаноти» (Dialeurodes citri Ashmead), «Шарқ ситрус қалқондори» (Unaspis yanonensis Kuwana), «Ананас унсимон қурти» (Dysmicoccus brevipes Cockerell). Маълум қилинишича, бундай зараркунандалар қарийб 20 та юкда топилган.

Зарарланган маҳсулотлар бўйича Хитой давлатининг ўсимликлар карантини ва ҳимояси бўйича миллий ташкилоти расман огоҳлантирилган, тегишли маълумотлар ҳамда ҳужжатлар тақдим этилган.

Тақиқ амал қилган даврда эса Хитойдан олиб келиниши режалаштирилаётган мандарин ва ананасларга карантин рухсатномаларини расмийлаштириш вақтинча тўхтатилди.

Қайд этилишича, бу чора доимий эмас — у эҳтимолий хавф туғдирувчи карантин объектларининг Ўзбекистон ҳудудига кириб келиши ва тарқалишининг олдини олиш мақсадида жорий этилган. Шундай қилиб, мутахассислар ҳозирча бозорга кириб келаётган мевалар хавфсизлиги масаласини биринчи ўринга қўймоқда.