Google DeepMind янги инқилобий технологияни тақдим этди

Google DeepMind кеча янги ва ўзига хос Project Genie лойиҳасини оммага намойиш қилди. Бу сунъий интеллект (AI) фойдаланувчи киритган оддий матн ёки юклаган расм асосида интерактив ўйин дунёсини яратиш имкониятига эга. Янги технология Genie 3 модели асосида ишлайди ва индустрияда янги саҳифа очиши кутилмоқда.

Эндиликда фойдаланувчилар, масалан, "Зефир қаср" деб ёзишлари билан сунъий интеллект нафақат тасвирни чизади, балки уни бошқариладиган қаҳрамонга эга бўлган ўйин муҳитига айлантиради. Фойдаланувчи ушбу дунё ичида юриши ва ҳаракатланиши мумкин. Ҳозирги босқичда ўйин жараёни 60 сониялик лимит билан чекланган.

Синов жараёнлари шуни кўрсатдики, Genie 3 модели мултфилм, аниме ва пластилин услубидаги хаёлий дунёларни яратишда мукаммал натижаларни қайд этмоқда. Бироқ, фотореалистик тасвирлар борасида технология ҳали такомиллаштиришга муҳтож. Шунингдек, муаллифлик ҳуқуқини ҳимоя қилиш мақсадида Disney ва бошқа машҳур брендларнинг ҳимояланган қаҳрамонларини яратиш блокланган.

Мутахассисларнинг таъкидлашича, Project Genie шунчаки кўнгилочар ўйинчоқ эмас. Бу Ҳақиқий Сунъий Онг (AGI) яратиш йўлида ташланган муҳим қадам ҳисобланади. Чунки сунъий интеллект эндиликда дунё физикасини тушуниб, уни виртуал муҳитда симуляция қилиш қобилиятига эга бўлмоқда. Келажакда ушбу технологиядан роботларни ўқитиш ва ўргатиш жараёнларида асос сифатида фойдаланиш режалаштирилган.