Мактабгача таълимда ўйин модели: Янги авлод бошланади босқичма-босқич

4 февраль куни Ўзбекистон президенти Шавкат Мирзиёев мактабгача таълим ва тарбия тизимини янада такомиллаштиришга доир таклифлар тақдимоти билан танишди. Учрашувда асосий эътибор таълим сифатини кўтариш, болалар ривожини кучайтириш ва тизимни замонавий талабларга мослаштиришга қаратилди.

Тақдимотда мактабгача таълимда ўйинга асосланган таълим модели жорий этиш таклифи илгари сурилди. Яъни боланинг табиий қобилияти, қизиқиши ва ёш хусусиятларини инобатга олган ҳолда таълим-тарбия жараёни ўйин орқали ташкил этилади. Бу ёндашув бола учун “ўқиш”ни мажбурият эмас, қизиқарли жараёнга айлантириши кутилмоқда.

Қайд этилишича, мактабгача давр — боланинг интеллектуал, ижтимоий ва маънавий ўсиши учун ҳал қилувчи босқич. Шу боис ўқув муҳитини янгилаш, илғор хорижий тажрибаларни татбиқ қилиш ва бола ривожига хизмат қиладиган методикаларни кучайтириш муҳим вазифа сифатида кўрилмоқда.

Шунингдек, бир йиллик мактабга тайёрлов гуруҳларини мажбурий умумий ўрта таълимнинг дастлабки босқичи сифатида жорий этиш масаласи ҳам муҳокама қилинди. Мақсад — болани мактабга пухта тайёрлаш ва таълимда узлуксизликни таъминлаш.

Яна бир муҳим йўналиш — “Янги авлод” мактабгача таълим ташкилотлари тармоғини шакллантириш. Режага кўра, 2026–2028 йилларда ҳар бир ҳудудда 120 ўринли “Янги авлод” давлат боғчалари ва улар таркибида болаларни ривожлантириш инновацион марказлари ташкил этилади.

Кадрлар масаласи ҳам четда қолмади: педагоглар салоҳиятини ошириш, таълим дастурларини халқаро илғор тажрибага мослаб янгилаш, амалда ишлаб келаётган ўрта махсус маълумотли педагоглар учун дуал таълим (“5+1”) асосида бакалавр тайёрлаш каби чоралар кўзда тутилмоқда.

Давлат раҳбари таклифларни ҳар томонлама пухта ишлаб чиқиш, уларни шошмасдан, лекин аниқ режа асосида босқичма-босқич ҳаётга татбиқ этиш зарурлигини таъкидлади.