Саудия журналисти Роналду олдида тиз чўкмаймиз деди

Криштиану Роналду «Ал-Наср»нинг бир қатор ўйинларини бойкот қилаётгани айтиламоқда. Манбаларга кўра, футболчи клуб бошқарувидаги қарорлар ва иш услубидан норози. Бу ҳақда euro-football.ru хабар беради.

Вазиятга Саудия Арабистонидаги таниқли телебошловчи Валид ал-Фараж ҳам муносабат билдирди. У лига низоми ва мамлакат спорт тизими «қизил чизиқ» эканини таъкидлаб, жаҳон юлдузи мақоми ҳеч кимга қоидаларни бузиш ҳуқуқини бермаслигини қайд этди.

«Саудия чемпионати ҳар қандай футболчидан устун. Роналду регламентни ҳурмат қилиши ва қонунларга амал қилиши керак. Биз Роналду олдида тиз чўкмаймиз. Нимани хоҳлайсиз, уни ялиниб қолишимизни? Мамлакатимиз ва лигамиз ҳаммадан устун», — дея ал-Фаражнинг сўзларини NewsRoom келтиради.

Эслатиб ўтамиз, Роналду билан «Ал-Наср» ўртасидаги шартнома 2027 йилнинг ўрталаригача амал қилади.