Точилин МОҚ қарори ФИФА ва УЕФАдаги банларга таъсир қилади
Футбол эксперти Александр Точилин «Евро-Футбол.Ру»га берган интервьюсида ФИФА президенти Жанни Инфантинонинг Россияга қўйилган тақиқни бекор қилиш ҳақидаги фикрлари, шунингдек, МОҚ яқин вақт ичида россиялик спортчиларга нисбатан барча санкцияларни олиб ташлаши мумкинлиги тўғрисидаги хабарларни муҳокама қилди. Бу ҳақда euro-football.ru хабар беради.
Точилин жаҳон ОАВ Миланда бўлиб ўтган МОҚ йиғилишида Россия спортига нисбатан чекловларни бекор қилиш бўйича принципиал қарор қабул қилингани ҳақида ёзаётганини эслатиб, бундай сценарий рўй беришига умид билдирди. Унинг айтишича, бу мавзу анча вақтдан бери кун тартибида, Европадан қатъий сиёсий қарор керак, қолаверса Россиясиз йирик мусобақаларнинг қизиқиши ва интригалари камайиб қолишини улар ўзлари ҳам тушунади.
Эксперт Инфантинонинг Россия жамоаларини четлатиш “маъносиз” экани ҳақидаги баёнотини ҳам шу жараёнларнинг давоми сифатида баҳолади. Точилинга кўра, Россияга нисбатан ёндашувда иккиёқлама стандарт ва бирёқлама қарашлар кўп бўлди, бироқ дунёдаги вазият ўзгарар экан, тақиқнинг ўзи ҳам тобора “абсурд” кўринаётгани сезилмоқда.
Точилин МОҚ санкцияларни бекор қилса, бу футболга ҳам таъсир қилиши мумкинлигини таъкидлади. Унинг фикрича, агар МОҚ каби йирик ташкилот биринчи бўлиб чекловлардан воз кечса, бу прецедент яратади ва ФИФА ҳамда УЕФА каби тузилмалар ўз қарорларини қайта кўриб чиқишга мажбур бўлади.
Инфантино келажакда сиёсий сабаблар билан жамоаларни мусобақалардан четлатишни қонунан тақиқлаш кераклигини ҳам айтганди. Точилин бу ғояни қўллаб-қувватлашини билдириб, спортнинг асосий шиори сиёсатдан холи бўлиши кераклигини, Россияга нисбатан қабул қилинган қарорлар эса айнан шу тамойилга зид келганини қайд этди.
Шунингдек, ОАВда ФИФА апрел ойидаги конгрессда Россиянинг халқаро турнирларга тўлиқ қайтиши масаласини кўриб чиқиши мумкинлиги ҳақида ёзилмоқда. Точилин бундай имкониятни рад этмади: агар бундай гап-сўзлар кетаётган бўлса, демак, маълумотлар ҳаводан олинмаган.
Эксперт Россияга рухсат берилган тақдирда ҳам айрим рақиблар майдонга тушишдан бош тортиши мумкинлиги ҳақидаги саволга ҳам жавоб берди. Унинг таъкидлашича, ҳар бир ташкилотнинг ўз регламенти бор ва кимдир уни бузса, сабабидан қатъи назар, белгиланган интизомий чоралар қўлланиши керак; техник мағлубиятлар амалиёти бошқаларга ҳам сигнал бўлиб, бундай демаршлар охир-оқибат ўзларига зарар келтиришини англатади.