Наумов Моуриньога Саудия Арабистонини мос манзил деб билди

«Локомотив»нинг собиқ президенти Николай Наумов «Бенфика» бош мураббийи Жозе Моуриньога қайси чемпионат кўпроқ тўғри келиши ҳақида фикр билдирди. У «Евро-Футбол.Ru»га берган интервьюсида португалиялик мутахассис учун энг мос йўналиш сифатида Саудия Арабистонини тилга олди. Бу ҳақда euro-football.ru хабар беради.

Наумовнинг айтишича, Моуриньонинг энг кучли даври ортда қолган: у мураббийга танаффус кераклигини, футбол қарашларида эса замондан бироз ортда қолаётганини таъкидлади. Эксперт фикрича, илгари сирли ва кутилмаган ечимлари билан ажралиб турган Моуриньо ҳозирда оддийроқ, ўртамийона кўринишда қолмоқда.

Наумов Саудия Арабистонида Моуриньо ўзини қулай ҳис қилиши мумкинлигини қайд этди: у ерда маошлар юқори, шов-шув ва можароларни ёқтиришади, шунингдек, катта номга эга ёши ўтган футболчилар билан ишлаш имконияти ҳам бор.

Моуриньо бошқарувидаги «Бенфика» Европа Чемпионлар лигаси 1/16 финалида Мадриднинг «Реал» жамоасига қарши майдонга тушади. Дастлабки учрашув 17 февраль куни Португалияда бўлиб ўтади.