Антонин Паненка «паненка» услубидаги пенальти ҳақида гапирди

Афсонавий футболчи Антонин Паненка пенальти тепишда «паненка» услубидан фойдаланиш рақибни менсимаслик деган фикрга қўшилмаслигини айтди. У бу зарбани 1976 йилги Европа чемпионати финалида амалга оширгани билан машҳур. Бу ҳақда euro-football.ru хабар беради.

Паненканинг таъкидлашича, ўша вазиятда у рақиб устидан кулиш ҳақида эмас, балки гол уриш эҳтимоли энг юқори бўлган ечим ҳақида ўйлаган. «Бундай зарба рақибга ҳурматсизликми? Мен бунга қўшилмайман. Ўша пайтда бу гол уришнинг энг ишончли йўли деб ўйлагандим. Европа чемпионати финалида рақиб устидан кулиш хаёлингга ҳам келмайди. Мен футболни яхши кўраман ва ҳеч кимни масхара қилишни истамаганман. Мен учун бу гол уришнинг энг яхши йўли эди», — деди Паненка Cadena SER радиосининг El Larguero дастурида.

Шунингдек, у аввалроқ ўз фикрича, Браҳим Диас Африка миллатлар кубоги финалида нега «паненка» услубида гол ура олмагани сабабларини ҳам изоҳлаганди.