Паненка «паненка» услубидаги пеналти ҳурматсизлик эмаслигини айтди

Афсонавий футболчи Антонин Паненка «паненка» услубида тепиладиган пеналти рақибни менсимаслик деган фикрга қўшилмаслигини билдирди. У бу зарбани 1976 йилги Европа чемпионати финалида амалга оширгани билан тарихда қолган. Бу ҳақда euro-football.ru хабар беради.

Паненканинг таъкидлашича, у ўша вазиятда рақиб устидан кулишни эмас, гол уриш эҳтимоли энг юқори бўлган вариантни танлаган. «Бундай зарба — рақибга ҳурматсизликми? Мен бунга қўшилмайман. Ўша пайтда бу гол уришнинг энг ишончли йўли деб ўйлагандим. Европа чемпионати финалида рақибни масхара қилиш ҳақида ўйламайсан. Мен футболни яхши кўраман ва ҳеч ким устидан кулишни истамаганман. Менимча, бу гол уришнинг энг яхши усули эди», — деди Паненка Cadena SER’нинг El Larguero дастурида.

Шунингдек, у аввалроқ ўз фикрича, Браим Диас нега Африка кубоги финалида «паненка» билан гол ура олмаганини ҳам изоҳлаган.