"Ан-Наср" клуби Роналдуни 40 миллионга инглиз клубларига таклиф қилди

Саудия Арабистонининг “Ан-Наср” клубида катта ўзгаришлар шамоли эсаяпти. Клуб раҳбарияти мамлакат Профессионал лигасининг энг машҳур юлдузи, жаҳон футболида энг кўп гол урган футболчи сифатида тилга олинаётган Криштиану Роналду билан хайрлашиш вариантини ҳам кўриб чиқишга тайёр экани айтилмоқда.

Маълумотларга кўра, “Ан-Наср” мутасаддилари португалиялик суперюлдузни Англия Премьер-лигаси клубларига 40 миллион фунт стерлинг атрофида таклиф қилган. TopSkills нашри хабарида қайд этилишича, Англиядан учта клуб бу таклифга дарҳол рад жавобини берган.

Шунга қарамай, саудияликлар “бўлди, тамом” дейиш ниятида эмас: клуб раҳбарияти футболчи учун янги манзил топиш устида ишни давом эттираётгани айтилади. Энг қизиқ нуқта эса шуки, Роналду трансферига Лиссабоннинг “Спортинг” клуби жиддий қизиқиш билдиргани ҳақида гап-сўзлар бор. Бу вариант мухлисларда алоҳида ҳис уйғотади, чунки айнан “Спортинг” — Роналдунинг катта футболга илк қадам қўйган жойи.

Эслатиб ўтамиз, Роналду 2022 йил 30 декабрь куни эркин агент сифатида “Ан-Наср” билан расман ҳамкорликни бошлаган. Кейинроқ, 2025 йил июнида шартнома 2027 йил ярмигача узайтирилгани айтилган. Шу сабаб бу хабарлар мухлисларни иккига бўляпти: бир тараф “у ҳали керак” дейди, бошқа тараф эса “катта сценарий тайёрланаётгандир” деб ўйлайди.

Молиявий томон эса умуман алоҳида кино: очиқланган маълумотларга кўра, Роналду спорт тарихидаги энг юқори маошлардан бирини олади. Унинг даромади шартнома давомида тижорат бонуслари билан бирга 400 миллион АҚШ долларидан ошиши қайд этилган.

Қисқаси, ҳозирги вазиятда бир нарса аниқ: “Ан-Наср” ҳам, Роналду атрофидаги бозор ҳам жим турмайди. Агар “Спортинг” варианти реал тус олса, бу фақат трансфер эмас — карьерани символик тарзда “бошланган жойда яна бир бор ёзиш” бўлади. Футболда баъзан сценарийлар режиссёрсиз ҳам зўр чиқади-да.