Компани 17 ёшли Карлга босим йўқлигини айтди

Мюнхеннинг «Бавария» жамоаси бош мураббийи Венсан Компани 17 ёшли ярим ҳимоячи Леннарт Карлнинг ўйини ҳақида фикр билдирди. Бу ҳақда euro-football.ru хабар беради.

Мутахассиснинг таъкидлашича, Карлга алоҳида босим юкланмаяпти: у ҳеч нарсани совға қилиб олаётгани йўқ, бироқ ёши инобатга олиниб, жамоани натижага етаклаш мажбурияти унинг зиммасига қўйилмаяпти. Компани Карлнинг ушбу учрашувда ҳам ҳужумда, ҳам ҳимояда ўзини яхши кўрсатганини қайд этди.

Бундеслиганинг 22-турида «Бавария» сафарда «Вердер»ни 3:0 ҳисобида йирик мағлуб этди. Карл учрашувни тўлиқ — 90 дақиқа ўтказиб, битта голли узатма билан ажралиб турди.

Жорий мавсумда Карл «Бавария» таркибида 30 та ўйинда майдонга тушди, 7 та гол урди ва 4 та ассист муаллифига айланди.