Зелинский «Ювентус» устидан ғалабани катта қадам деб баҳолади

Миланнинг «Интер» клуби ярим ҳимоячиси Пётр Зелинский «Ювентус»га қарши учрашувдан кейин ўз фикрлари билан ўртоқлашди. А Сериянинг 25-тур баҳси «нерадзуррилар»нинг 3:2 ҳисобидаги ғалабаси билан якунланди, ўйин тақдирини ҳал қилган гол эса учрашув сўнгида поляк футболчи ҳисобига ёзилди. Бу ҳақда euro-football.ru хабар беради.

«Гол албатта муҳим, аммо бугун бутун жамоа яхши ўйнади ва бу натижага лойиқ эди. Ғалабадан завқланяпмиз — катта иш бажарилди», — дея Зелинскийнинг сўзларини Sky Sport Italia келтирди.

Шунингдек, у жамоа ўйин давомида айрим вазиятларда эътиборни йўқотганини ҳам таъкидлади: «Рақибнинг жавоб голига ўхшаш ҳолатларга йўл қўймаслигимиз керак. Пионинг ажойиб голидан кейин олдинга чиқдик, кейин эса концентрация етишмади. Энг муҳими — биз ютдик», — деди Зелинский.

Маълумот учун, «Интер» турнир жадвалида 61 очко билан пешқадам бўлиб турибди.